Një 35-vjeçar shqiptar është vrarë me armë zjarri në Itali. Pas ekzekutimit, autorët e kanë futur në një makinë pa targa dhe e kanë hedhur në lumë, në tentativë për të zhdukur gjurmët. Mediet fqinje raportojnë se viktimë është shtetasi shqiptar Ferdinant Hoti, banues në Mirano, në provincën e Venecias. Trupi i pajetë i 35-vjeçarit shqiptar u gjet nga autoritetet italiane i futur në një qese të zezë, me duart e lidhura. Hetuesit italianë po përpiqen të rindërtojnë lëvizjet dhe takimet e fundit të shqiptarit, për të zbuluar autorët dhe motivin e ekzekutimit, që dyshohet se lidhen me larje hesapesh për trafik droge. Mediat italiane shkruajnë se Ferdinant Hoti është identifikuar nga hetuesit përmes shenjave të gishtërinjve. Sipas rezultateve të autopsisë, shqiptari është qëlluar me armë zjarri nga një distancë e afërt. Gjithashtu, hetuesit e vendit fqinj po hetojnë edhe pistën e hakmarrjes, pasi dyshohet i lidhur me një ngjarje të ndodhur natën e 30 qershorit dhe 1 korrikut, kur një shtetas shqiptar u qëllua me armë në shpatull, teksa po kthehej në shtëpi me partneren e tij. Karabinierët po analizojnë të gjitha kamerat e sigurisë, përfshirë ato të një punishteje zdrukthëtarie aty pranë. Kontrollet po vijojnë edhe në lumë. Gjithashtu, karabinierët po kërkojnë targat e hequra të makinës, armën e mundshme të krimit dhe çdo send tjetër që autorët mund të kenë hedhur në ujë.