Sipërmarrësi Ermal Beqiraj do të ekstradohet në Shqipëri, në një procedurë që mund të zgjas disa javë, sipas burimeve nga prokuroria franceze. Mediat në Francë zbulojnë se Shqipëria ka parashtruar më 1 gusht, kërkesën për transferimin nga Parisi të biznesmenit shqiptar në kërkim ndërkombëtar për dosjen AKSHI, që u arrestua një javë më parë për fluturimin mbi një central bërthamor francez. 44 vjeçari u gjykua në një seancë të përshpejtuar dhe u dënua në Amiens me një gjobë prej 7,000 eurosh, më pas u vu në paraburgim në pritje të procedurave të ekstradimit, sipas zyrës së prokurorit francez. Janë publikuar edhe të dhëna mbi hetimin nga Zyra Qendrore për luftën kundër kriminalitetit të rëndë financiar në Francë (OCRGDF), e cila në koordinim me autoritetet gjyqësore franceze dhe shqiptare po përgatisin masa për të sekuestruar asetet e identifikuara si pasuri kriminale të Beqirajt. Spak bëri me dije se në bashkëpunimin mes dy shteteve ishin konstatuar dy apartamente, mjete motorrike, një aeroplan turistik, llogari bankare me vlerë mbi dy milionë euro si dhe një kështjellë në departamentin e OISE rreth 2.6 milionë euro. Prokuroria e Posacme kundër Korrupsionit njoftoi se lokalizimi i Beqirajt në Francë ishte bërë prej kohësh, e që prej mes qershorit kanë kryer hetime të përbashkëta me autoritetet franceze për kapjen e Ermal Beqirajt, i cili shkeli në hapësirën ajrore të kufizuar të centralit bërthamor të Penly-t. Mediat franceze kanë përmendur edhe fotografinë e sipërmarrësit 44 vjecar me presidentin Emanuel Macron, të postuar prej tij vitin e kaluar në platformën Linkedin, ku e cilësonte atë moment takimi një krenari.