Moska po zgjeron ndikimin e saj në shoqëritë jo të stabilizuara të Evropës Juglindore, duke nxitur aktorët që pengojnë proceset e demokratizimit. Synimi: të pengohet integrimi në BE i rajonit, thote analistja gjermane Marion Kraske. Një duzinë burrash u mblodhën në javën e dytë të marsit në Vishegrad, qyteti i lindjes së shkrimtarit të njohur, Ivo Andrić, për të nderuar "vullnetarë" rusë, që mbështesnin në luftën e Bosnjës në vitet 1992-1995 trupat serbe dhe u vranë në luftime, kujton Kraske. Një shoqatë serbo-ruse kishte përgatitur edhe një kurorë. Para krimeve të shumta të bërë nga serbët në Bosnjë, të mbijetuarit e luftës bënë fjalë për lëndim rishtazi të viktimave, 26 vjet pas fundit të luftës. Në vend që të nderohen vullnetarët rusë të luftës, duhej të hetohej më shumë përzierja e tyre në krime lufte, kërkoi një shoqatë e grave për viktimat e luftës. Ky rast nuk është i vetmi në Ballkan që mban nënshkrimin rus. Me qëllim Moska përpiqet të zgjerojë influencën, me një mënyrë hibride veprimi, për të përcaktuar terrenin e saj dhe nxitur aktorët, që pengojnë proceset e demokratizimit. Në vendin më të brishtë në rajon, Bosnje-Hercegovinë, Rusia mbështet ku të mundet serbët, dhe kroatët, që duan të hedhin në erë rendin e tanishëm të paqes. Moska po përdor gabimet e Bashkimit Europian këtu, që prej vitesh ndjek një politikë zbutjeje me elitat e politike të Ballkanit Perëndimor, vazhdon ekspertja, që kujton gjithashtu sesi duke shfrytëzuar dhe dështimin e strategjisë së BE për vaksinimin, Rusia kërkoi që në kohë krize të profilizohej dhe si aktore potente.