Top Channel mëson nga disa burime të pavarura nga njëri-tjetri, se Shqipëria është përfshirë në një operacion, që besohet të jetë evakuim potencial i shtetasve të saj që jetojnë apo punojnë në Izrael. Gazetari Top Channel Muhamed Veliu, raporton se avioni i një kompanie shqiptare ka mbërritur paraditen e sotme në Izrael dhe ka nisur udhëtimin drejt Tiranës në orën 16:00. Ky avion charter është nisur nga aeroporti Tel Avivit “Ben Gurion” dhe pritet të mbërrijë rreth orës 17:54 minuta në Tiranë. Për momentin nuk jepen të dhëna sa është numri shqiptarëve në bordin e këtij fluturimi special Tel Aviv-Tiranë, për vetë ndjeshmërinë e çështjes. Mes Izraelit dhe Shqipërisë apo anasjelltas nuk ka linjë ajrore direkte dhe fluturimi mund të ndiqet fare lehtë në aplikacionet e gjurmimit të avionëve Flight-Radar.