Kompania “Eco Tirana” do të nisë një aksion të gjerë për pastrimin e të gjitha zonave problematike jashtë qendrës së Tiranës, pas braktisjes së punës nga kompanitë private, që ishin pajtuar për kryerjen e shërbimit. Lajmi u bë I ditur nga kryebashkiaku Erion veliaj, gjatë takimit që zhvilloi sot me punonjësit e pastrimit. “Eco Tirana do të marrë në administrim të gjithë qytetin, duke u lënë operatorëve private që mbulonin zonat e ‘5 Majit’, ‘Don Boskos’, lagjen ‘Rilindja’ te Unaza e Madhe, një afat nga 1 tetor deri në 1 nëntor, sepse si çdo marrëdhënie që ndërpritet jepet edhe një afat sepse nuk bëhet në mënyrë të palajmëruar. Ata menduan se duke i lënë këto zona pa pastruar dhe duke i çuar foto këtyre faqeve ‘anonim të lutem’, - apo duke nxjerrë disa nga këta që ne i kemi rrahur ‘si gomari në duhan’ me 60 mijë vota diferencë, - do t’i bënin presion kryetarit të bashkisë dhe ne do të dorëzoheshim, do ta hanim presionin. Ne nuk dorëzohemi! Vendimi ishte: Meqë ata duan ta zgjidhin me presion, ne do ta marrim që tani në administrim zonën te lagjja ‘Rilindja’ te Unaza e Madhe, po ashtu edhe zonën e ‘5 Majit’ te Bregu i Lumit, dy muaj para mbarimit të kontratës së shërbimit. Kjo do të thotë se në dy muajt e ardhshëm do duhet që të operojmë me një sens emergjence në këto zona.” Me urdhrin e ri të kryetarit të Bashkisë, administratorët e njësive do të mbikëqyrin dhe do të përgatisin një raport për të ndihmuar kompaninë publike të pastrimit. “Kam vendosur që pjesë e aksionit të bëhen edhe administratorët e njësive. Nga sot kam nxjerrë një urdhër, ku detyra e administratorëve të njësisë do të jetë gjithashtu edhe mbikëqyrja, edhe ndihma, edhe raportimi për Eco Tiranën dhe kryetarin e Bashkisë. ju lind edhe detyra që të mbikëqyrni, të ndihmoni, të bëni raportime dhe të gjithë bashkë të dalim faqebardhë me pastrimin e Tiranës” Kryebashkiaku Veliaj tha se me kalimin e emergjencës së krijuar, bashkia do të rrisë pagat dhe shpërblimet për punonjësit e pastrimit të Tiranës.