Organizata Botërore e Shëndetësisë paralajmëroi se është jashtë kontrollit shpërthimi i Ebolës në Republikën Demokratike të Kongos. Kreu i OBSH-së, Tedros Adhanom Ghebreyesus, ngriti shqetësimin për një përhapje të mëtejshme kombëtare dhe ndërkombëtare të virusit. Sipas bilancit të fundit të publikuar nga autoritetet e Republikës Demokratike të Kongos, rreth 5,000 persona janë infektuar dhe më shumë se 2,300 kanë humbur jetën në gjashtë provinca dhe 55 zona shëndetësore. “Le të jemi të sinqertë: epidemia mbetet e pakontrolluar”, tha kreu i OBSH-së. Republika Demokratike e Kongos shpalli më 15 maj, pas një vonese prej disa javësh, epideminë e 17-të të Ebolës në vend. Shpërthimi është përqendruar në rajonet veriore dhe lindore, ku prania e shtetit është e dobët, infrastruktura shëndetësore është e pamjaftueshme dhe kapacitetet e reagimit janë të mbingarkuara nga rritja e rasteve. Aktualisht, OBSH e vlerëson rrezikun për shëndetin publik si “shumë të lartë” në Republikën Demokratike të Kongos, “të lartë” në Ugandë dhe vendet e tjera kufitare me Kongon, ndërsa për pjesën tjetër të Afrikës dhe botën rreziku konsiderohet “i ulët”.