Papa Françesku ndërroi jetë nga një sulm në tru, ka njoftuar Vatikani të hënën 12 orë pas njoftimit të parë për vdekjen e tij. Në njoftim u tha gjithashtu se 88-vjeçarit pak minuta më pas i ndaloi së funksionuari edhe zemra. Po çfarë është sulmi në tru? Sipas mjekësisë, sulmi në tru nënkupton kur truri papritmas nuk merr më gjak dhe oksigjen të mjaftueshëm, gjë që çon në dëmtimin e qelizave të trurit. Ky sulm shpesh rezulton të jetë vdekjeprurës në rast se nuk trajtohet me urgjencë. Qindra njerëz janë mbledhur në sheshin “Shën Pjetri” në Vatikan ku po luten për Papa Françeskun. Në mbarë botën janë mbajtur mesha për nder të tij. Vatikani konfirmoi se në testamentin e fundit, Papa Françesku kishte kërkuar që të varrosej në Bazilikën e Shën Marisë së Madhe në Romë dhe pa dekorime të veçanta. Ai gjithashtu kishte kërkuar që vendi i tij i prehjes të kishte mbishkrimin e emrit të tij në latinisht “Franciscus”.