Ky është momenti i arrestimit të Presidentit të Venezuelës, Nicolas Maduro, nga forcat e ushtrisë amerikane. Fotografia e diktatorit Maduro me pranga në duar u publikua nga Presidenti i Shteteve të Bashkuara të Amerikës, Donald Trump, e cili e cilësoi kapjen e tij si një ndër operacionet më të mëdha dhe më të suksesshëm. Në fjalimin e tij në Florida, pas arrestimit të presidentit venezuelian, Presidenti Trump tha se Shtetet e Bashkuara do të drejtojnë Venezuelën për momentin, ndërsa e quajti Maduron një diktator dhe bos të drogës. "Ne do ta drejtojmë vendin deri në kohën kur të mund të bëjmë një tranzicion të sigurt, të duhur dhe të drejtë. Ishte një nga operacionet më të fuqishme të ushtrisë amerikane, për të arrestuar diktatorin Maduro. Një nga dislokimet më të fuqishme të ushtrisë amerikane. Një sulm spektakolar në Karakas, i paparë që nga Lufta e Dytë Botërore. Kemi përgatitur dhe një valë tjetër sulmesh ndaj Venezuelës, por nuk është e nevojshme ende”.