Nga konferenca për shtyp e funndvitit, kryeministri Edi Rama i bëri një bilanc vitit që po lemë pas duke e quajtur si faktin më domethënës çeljen e dy kapitujve me BE-në. Janë organizuar në Shqipëri një sërë samitesh të pamendueshme deri disa vite më parë tha kryeministri dhe këtë ia atribuoi të shikuarit e Shqipërisë me respekt në arenën ndërkombëtare. Por akoma më e pamendushme deri disa vite më parë, është mikpritja në Tiranë e Samitit të NATO-s në vitin 2027, gjë për të cilën ne kemi filluar punën së bashku më NATO-n. Ardhja e Presidentit të Shteteve të Bashkuara dhe të gjithë udhëheqësve të NATO-s në Tiranë është njëkohësisht dhe një mesazh shumë i qartë për të gjithë, lidhur me Shqipërinë, lidhur me pozicionin tonë të ri politik në arenën ndërkombëtare. Edhe njëherë tjetër Edi Rama reformën në drejtësi e quajti një projekt të patur e realizuar nga PS. Të mos-komentuarin e të hetuarve apo të dënuarve nga SPAK e quajti një vendim strategjik, megjithatë dënoi ashpër atë që quajti gjyq publik, politik e mediatik ndaj kryebashkiatut të Tiranës Erion Veliaj pa patur një akuzë zyrtare nga SPAK. Edi Rama e kundërshtoi paralelizmin e përjashtimit nga PS të ish ministrit Samir Tahiri, me një veprim të ngjashëm për Erion Veliaj. Vuri në pah transformimin e Tiranës prej Erion Veliaj dhe angazhimin e tij politik në PS. Pasi vlerësoi punën dhe bashkëpunimin ndërkombëtar si partnerë të besueshëm të prokurorëve të SPAK në luftën me krimin e organizuar kryeministri nuk e kishte për momentin një përgjigje për propozimin amerikan që “prokurorët e SPAK duhet të lejojnë të aplikojnë sërish pas përfundimit të mandatit të tyre aktual”.