Një prej gjashtë personave të plagosur nga shpërthimi i një bombule gazi në Markatomaj të Lezhës, më 29 gusht, ka ndërruar jetë pas 12 ditësh në gjendje kritike. Viktima është 40-vjeçari Saimir Kola, i cili nuk ka mundur t’u mbijetojë plagëve të rënda të shkaktuara nga shpërthimi. Kola ishte personi që u përball i pari me shpërthimin e bombulës së gazit, duke marrë edhe dëmtimet më të rënda. Ai kishte pësuar djegie në rreth 90 për qind të sipërfaqes së trupit. Pas ngjarjes, 40-vjeçari u transportua fillimisht në Spitalin e Traumës në Tiranë, për shkak të gjendjes së rënduar shëndetësore. Por, për shkak të djegieve të rënda, ai u dërgua më pas në Itali, ku mori trajtim të specializuar. Pavarësisht përpjekjeve të mjekëve italianë, pas 12 ditësh trajtim, Saimir Kola ka ndërruar jetë. Shpërthimi ndodhi në banesën e familjes Kola në fshatin Markatomaj. Si pasojë u plagosën gjashtë anëtarë të familjes, mes tyre edhe një i mitur. Ngjarja e rëndë tronditi familjen dhe banorët e zonës, ndërsa autoritetet vijojnë hetimet për të zbardhur rrethanat dhe shkakun e shpërthimit të bombulës së gazit.