Autoritetet italiane po hetojnë një zbulim tronditës në Sagrado, ku mbetje njerëzore u gjetën të premten, më 7 nëntor, në kopshtin e një vile. Dyshohet se ato mund t’i përkasin, Vito Mezzalira-s, ish-postierit 66-vjeçar që u zhduk në korrik të vitit 2019. Mbetjet u gjetën brenda një pusi, të futura në disa çanta, pas një operacioni hetimor që përdori radarë nëntokësorë dhe njësi qensh të trajnuar. Hetuesit arritën të identifikojnë zonën e dyshuar falë mbivendosjes së imazheve të Google Earth, të cilat treguan se mbi pus ishte hedhur një shtresë betoni pas vitit 2019. Autopsia pritet të identifikojë nëse mbetjet kryesisht kocka dhe copa rrobash i përkasin ish-postierit dhe të zbulojë nëse vdekja ka ardhur nga shkaqe natyrore apo nga dhuna. Shtëpia e viktimës dhe ajo ngjitur janë sekuestruar nga autoritetet. Fillimisht, rasti u orientua drejt një mashtrimi ndaj shtetit, pasi partnerja e tij kishte tërhequr pensionin e tij nga viti 2019 deri në 2023. Orlando pretendonte se ai ishte larguar jashtë shtetit për arsye romantike ose nga frika e kreditorëve.