Është ndarë nga jeta në mënyrë të parakohshme ish-deputeti i Partisë Socialiste, Andis Harasani. Ai ndërroi jetë këtë të diel, në moshën 53-vjeçare, pas dy vitesh betejë me sëmundjen e rëndë. Lajmi i trishtë është bërë i ditur nga bashkëshortja e tij, e cila shprehet se Andis luftoi me forcë për jetën dhe nuk reshti së dhuruari dashuri deri në fund. “Me hidhërim të thellë, njoftojmë humbjen e parakohshme të njeriut tonë të zemrës, babait, bashkëshortit, djalit, vëllait, mikut Andis Harasani. Andisi ynë luftoi për jetën me forcën, besimin dhe vendosmërinë që e karakterizonte gjithmonë. Ai luftoi fort për ne dhe nuk rreshti kurrë së dhuruari dashuri, mbështetje e forcë. Fatkeqësisht, e humbëm betejën kundër kancerit. Unë, Thea dhe Henry jemi përjetësisht mirënjohës për këtë rrugëtim jete që krijuam bashkë. Ti do mbetesh në zemrat tona, njeriu ynë më i shtrenjtë, me humor të pakrahasueshëm, gjithë mençuri e guxim për të ecur përpara. Do na mungosh pafundësisht, dashuria jonë!”, shkruan bashkëshortja e tij.