Donald Trump njoftoi të mërkurën nëpërmjet Truth Social se do të takohet me Zohran Mamdani-n, socialistin demokrat i cili u zgjodh kryetar bashkie i Nju Jorkut në zgjedhjet e fundit bashkiake, nesër, të premten, më 21 nëntor, në Zyrën Ovale të Shtëpisë së Bardhë. “Kryetari komunist i bashkisë së Nju Jorkut, Zohran ‘Kwame’ Mamdani, ka kërkuar një takim. Ne kemi vendosur që ky takim të zhvillohet në Zyrën Ovale të premten, më 21 nëntor”, tha presidenti. Mamdani fitoi zgjedhjet e bashkisë së Nju Jorkut ndaj kolegut të tij demokrat Andrew Cuomo të cilin Trump e mbështeti në garë muajin e kaluar. Mamdani ka qenë nën shënjestrën e kritikave të presidentit që kur ky i fundit fitoi primaret brenda partisë demokratike. Para pak kohësh, Zohran Mamdani, ka paralajmëruar masa të menjëhershme për të mbrojtur qytetin nga politikat e mundshme të administratës së Donald Trump. Në një intervistë, Mamdani tha se po punon për ngritjen e një strukture të gjerë ligjore me rreth 200 avokatë, të gatshëm për të mbrojtur interesat e qytetit në gjykatë. Reagimi i tij vjen pasi Presidenti amerikan Donald Trump e ka quajtur Mamdanin një “komunist”, duke shtuar se “njerëzit do të fillojnë të largohen nga Nju Jorku, ata do të ikin nga regjimi komunist.”