Dy aksidente të rënda kanë tronditur edhe këtë të premte Durrësin, duke regjistruar një tjetër bilanc tragjik në rrugët e tij. Ngjarja më e rëndë ndodhi në Rrashbull, në aksin Shkozet-Shijak. Një 32-vjeçar, që po lëvizte me biçikletë, u përplas nga një automjet, drejtuesi i të cilit u largua menjëherë nga vendi i ngjarjes ku duken shenjat e frenimit të fortë, ndërsa rrethanat dhe shpejtësia e mjetit janë pjesë e hetimit. Për 32-vjeçarin, përplasja rezultoi fatale, ndërsa drejtuesi i automjetit nuk ndaloi për t’i dhënë ndihmë të dëmtuarit. Policia po punon për identifikimin dhe kapjen e tij. Një tjetër aksident u regjistrua më herët në rrugën poshtë Vilës së Zogut, ku një automjet tip “Benz” doli nga rruga dhe përfundoi disa metra më poshtë. Sipas Policisë, drejtuesja e mjetit u transportua në spital, ku ndodhet nën kujdesin e mjekëve. Bilanci i aksidenteve në Durrës mbetet shqetësues. Vetëm gjatë kësaj jave, 5 persona kanë humbur jetën dhe disa të tjerë janë plagosur në ngjarje të rënda rrugore. Shpejtësia, pakujdesia dhe shkelja e rregullave të qarkullimit mbeten faktorët që rrisin rrezikun në rrugë. Ndërkaq gjatë kësaj jave, Policia Rrugore u ka hequr lejen e drejtimit 44 drejtuesve dhe ka vendosur gjoba të shumta për shkelje të rregullave të qarkullimit.