E diela regjistroi një bilanc të rëndë sa i përket aksidenteve në rrugët e vendit. Një person humbi jetën dhe 13 të tjerë u plagosën gjatë 24 orëve të fundit. Fatale rezultoi për një drejtues 39-vjeçar aksidenti që ndodhi në rrugën nacionale Çermë-Divjakë në fshatin Çermë-Shkumbin. Dy mjete, një tip BMË dhe një Opel janë përplasur kokë më kokë, e për pasojë humbi jetën 39-vjeçari Barjam Kacani, baba i tre fëmijëve, i cili udhëtonte me mjetin tip Opel. Ndërkohë që në automjetin tjetër, tip BMË u plagosën 5 persona, mes tyre tre fëmijë. Në një tjetër aksident të ndodhur pak orë më vonë në Lushnje mbeti i plagosur edhe një 47-vjeçar që udhëtonte me motor në aksin rrugor “Fier i Ri–Ngurrëz”. Mjeti doli nga rruga, dhe drejtuesi u plagos rëndë. Gjatë mesditës së të dielës, shtatë persona të tjerë u plagosën në segmentin Milot–Rrëshen të Rrugës së Kombit, në afërsi të Fangut të Mirditës. Mes të plagosurve kishte edhe 2 fëmijë të moshave 12 dhe 9 vjeç. Shkak paraprak për këtë përplasje të fortë dyshohet të ketë qenë një parakalim i gabuar i kryer nga njëri prej automjeteve. Raportohet gjithashtu se është dashur ndërhyrja e ekipeve të emergjencës për nxjerrjen e dy personave që ndodheshin në një prej automjeteve të dëmtuara.