Zbardhet dëshmia e parë e dhënë në polici e autorit të tentativës për vrasje e ndodhur më Elbasan, mesditën e së shtunës. 52 vjecari Poli Boriçi mësohet të ketë deklaruar se donte të merrte hakun e të vëllait. “E bëra për t’u hakmarrë për vëllain tim, të cilin Kërtezi e ka plagosur 15 vite më parë”. Sipas dëshmisë së tij, sulmi ndaj 50-vjeçarit Ermir Kërtezi lidhet me një konflikt të vjetër mes dy familjeve.Boriçi ka pretenduar se Kërtezi kishte plagosur vëllain e tij rreth 15 vite më parë dhe se pasojat e asaj ngjarjeje kishin qenë të rënda, deri në paralizimin e tij. Ky version pritet të jetë pjesë e hetimeve për zbardhjen e plotë të motivit të atentatit, ndërsa organi i akuzës po verifikon rrethanat e konfliktit të hershëm dhe nëse ai ka qenë realisht shkaku që e ka shtyrë 52-vjeçarin drejt sulmit.