Një i ri që dyshohet se po planifikonte të ndërtonte bomba artizane për të kryer një sulm ekstremist islamik është arrestuar në pjesën perëndimore të Gjermanisë. I dyshuari, emri dhe mosha e të cilit nuk u publikuan, u arrestua të martën në mbrëmje, sipas autoriteteve. Ai akuzohet se po përgatiste një akt dhune serioze. Prokurorët thanë përmes një deklarate se besojnë se ai u radikalizua përmes internetit dhe përhapi propagandë duke lavdëruar veprimet e grupit terrorist të vetëquajtur “Shteti Islamik”. Gjatë një kontrolli në shtëpinë e tij në tetor u gjetën dy bajoneta. Hetuesit thonë se i dyshuari kishte planifikuar të ndërtonte bomba artizanale dhe t’i përdorte ato në një sulm. Ai mësoi në internet se si t’i ndërtonte bombat artizane, thanë prokurorët. Një tjetër kontroll në shtëpinë e tij këtë javë zbuloi “vegla të tjera” të cilat mund të jenë siguruar për t’u përdorur në ndërtimin e një mekanizmi ndezës, shtuan ata. Megjithatë, nuk ka të dhëna se i dyshuari kishte planifikuar të kryente një sulm të menjëhershëm. Hetuesit nuk gjetën asnjë eksploziv apo lëndë që mund të përdoren për shpërthimin. Një gjykatës të mërkurën urdhëroi që i dyshuari të mbahet në paraburgim në pritje të ngritjes së një aktakuze të mundshme.