Enklava spanjolle e Ceutës, e ndodhur në Afrikën Veriore, po përballet me njërën prej krizave më të rënda humanitare dhe diplomatike të viteve të fundit. Autoritetet lokale konfirmuan zyrtarisht se numri i të vdekurve ka arritur në të paktën 72 persona, pas një fluksi masiv ku rreth 60,000 emigrantë marokenë tentuan të futen në territorin spanjoll duke notuar rreth postbllokut kufitar në Detin Mesdhe. Pas alarmit të shkaktuar midis të mërkurës dhe të premtes, situata këtë të dielë po shkon drejt normalizimit. Policia dhe trupat ushtarake spanjolle kanë zbritur në terren duke patrulluar rrugët e enklavës. Sipas delegatit të qeverisë spanjolle në Ceuta, Miguel Angel Perez Triano, pjesa më e madhe e emigrantëve janë kthyer vullnetarisht në Marok brenda 48 orëve. Nëpër rrugë dhe në një zonë industriale të braktisur shihen ende grupe të vogla të miturish, të cilët shprehen se qëllimi i tyre i vetëm është të arrijnë në Spanjën kontinentale. Ndërkohë, rojet bregdetare po pastrojnë zonën kufitare dhe në det është vendosur një barierë e re lundruese prej 500 metrash për të rritur sigurinë. Autoritetet spanjolle kanë fajësuar bandat kriminale për organizimin e këtij fluksi, duke përhapur thashetheme të rreme në rrjetet sociale se një vendim i fundit i Gjykatës së Lartë të Spanjës do t'u siguronte emigrantëve një kalim më të lehtë. Nga ana tjetër, analistët ndërkombëtarë dyshojnë se ky mund të jetë një skenar i mirëmenduar nga Maroku zyrtar. Sipas tyre, Rabati ka lehtësuar qëllimisht kontrollet në kufi për të ushtruar presion diplomatik mbi Madridin, për shkak të përmirësimit të fundit të marrëdhënieve mes Spanjës dhe Algjerisë, e cila konsiderohet si rivali historik i Marokut Deri më tani, zyrtarët marokenë kanë zgjedhur të heshtin duke mos dhënë asnjë deklaratë. Kjo valë emigracioni ka shpërthyer një "bombë" politike brenda strukturave të Bashkimit Europian, duke sjellë akuza dhe përçarje mes shteteve anëtare. Italia mori vendimin drastik për të pezulluar për një muaj marrëveshjen Shengen me Spanjën, duke rikthyer kontrollet rigoroze dhe vizat për lëvizjen e lirë. Ky veprim solli reagimin e ashpwr tw kryeministrit spanjoll, Pedro Sánchez. Për të menaxhuar situatën, 22 vende anëtare të bllokut kanë firmosur një letër të përbashkët ku kërkojnë një mbledhje urgjente ditën e martë për të koordinuar një përgjigje të shpejtë të bllokut.