Jo një, por janë dy raportet e Këshillit të Mandateve dhe Imunitetit dorëzuar Parlamentit me qëllim që të autorizojë SPAK-un për të vijuar me arrestimin apo heqjen e lirisë të ish kryeministrit Sali Berisha. Një ditë para se Kuvendi të mblidhet për të shqyrtuar kërkesën e SPAK, të cilën me shumë gjasa nuk do ta refuzojë, është zbardhur edhe përmbajtja e dy raporteve. Njëri është raporti i pesë deputetëve të mazhorancës, kurse tjetri është i Enkelejd Alibeajt, i vetmi përfaqësues i opozitës në Këshillin e Mandateve, që bashkoi votat me socialistët dhe në një mendje me ta kërkon përmes raportit të tij autorizimin e Kuvendit që t’i hapë rrugë kërkesës së Prokurorisë së Posacme për arrestimin e Sali Berishës, i cili akuzohet për korrupsion pasiv në lidhje me aferën e privatizimit të ish kompleksit Partizani. Anëtarët e mazhorancës në Këshillin e Rregullores, Mandateve dhe Imunitetit, Bledar Çuçi, Ermonela FELAJ, Klotilda BUSHKA dhe Arben PËLLUMBI rekomanduan unanimisht që Kuvendi t’i hapë rrugë Spakut për arrestimin/heqjen e lirisë së deputetit Sali Berisha. Referuar hetimit, në raport thuhet se është krijuar dyshimi i arsyeshëm, i mbështetur në prova se personi nën hetim Sali Berisha, në cilësinë e tij si Kryeministër i Shqipërisë, nga viti 2005 e në vijim, ka miratuar ligje, apo akte nënligjore, me qëllim përshtatjen e tyre sipas nevojave që paraqiteshin për pesë familje ish-pronare, me qëllim kthimin dhe në vijim shfrytëzimin si troje ndërtimore të territoreve ku janë shtrirë ish-Klubi shumësportësh “Partizani” dhe ish-Klubi i Futbollit “Partizani”, ku përfitues i drejtpërdrejte ndër të tjerë rezultonte të ishte bashkëshorti i vajzës së tij, shtetasi Jamarbër Malltezi. Ndërkohë edhe Alibeaj ka rekomanduar që Kuvendi të miratojë kërkesën e SPAK, duke shtuar se është tashmë i provuar fakti që Berisha ka shkelur detyrimet që kishte ndaj drejtësisë “Nëse do ndodhë që Kuvendi do japë autorizimin, do të jetë gjykata ajo që do të vlerësojë nëse ka vend apo jo për një masë më të rëndë. Për Kuvendin është i rëndësishëm fakti, që premisa bazë, ajo e shkeljes së detyrimeve të mëparshme është e provuar. Nëse gjykata do ta gjejë me vend kërkesën, është kompetencë e saj, porse Kuvendi, duhet të mos ndërhyjë në këtë kompetencë gjyqësore me mosdhënien e autorizimit të kërkuar”, thuhet mes të tjerash në raportin e Alibeajt.