Thirrjet për dorëheqjen e kryeministrit Edi Rama dhe gjithë klasës politike dominuan bulevardin “Dëshmorët e Kombit” edhe në protestën e 39 në kryeqytet. Nga sheshi, organizatorët e protestës denoncuan se disa deputetë nga Maqedonia e Veriut, që sipas tyre, mbështesin tubimin, nuk janë lejuar të vijnë në Shqipëri. Sipas mediave në Maqedoninë e Veriut, bëhet fjalë për deputetët Bekim Qoku dhe Adnan Azizi nga koalicioni i partive shqiptare në pushtet “VLEN”, aleatë të kryeministrit Hristijan Mickoski, si dhe Hasim Murtezani, zyrtar i lartë qeveritar dhe pjesë e VLEN. Sipas mediave fqinje, ata janë ndaluar për pak kohë në pikën kufitare të Qafëthanës dhe më pas tre politikanët janë lejuar të vazhdojnë, ndërsa një person tjetër që i shoqëronte është ndaluar. Në shenjë indinjate, ata janë kthyer të gjithë mbrapsht.