Kërkesa e një 20-vjeçareje për t’u divorcuar me bashkëshortin e saj në Arapaj të Durrësit për pak sa nuk ka përfunduar në tragjedi. Policia e Durrësit thotë se ka ndërhyrë në momentin që në banesën e Korab Ukës ka nisur dhuna. Sipas policisë ngjarja ka ndodhur në momentin që Gëzim Demiri së bashku me vajzën e tij ka shkuar në banesën e dhëndrit Korab Uka, 33-vjeç me qëllim prishjen e martesës së vajzës. Në banesë, këta shtetas janë konfliktuar dhe kanë ushtruar dhunë ndaj njëri-tjetrit dhe për pasojë kanë pësuar dëmtime fizike. Policia thotë se ka mundur të arrestojë Korabin, nënën e tij Nazime Uka dhe vjehrrin për akuzat "Mbajtja pa leje dhe prodhimi i armëve, armëve shpërthyese dhe i municionit" si dhe për veprën penale "Dhuna në familje". Policia thotë se nisi procedimin në gjendje të lirë edhe për nusen 20 vjeçare. Gjatë kontrollit në banesën e Korab Ukës policët gjetën një armë zjarri kallashnikov dhe 30 fishekë luftarak, të cilët u sekuestruan në cilësinë e provës materiale.