Një avokat u plagos me armë zjarri pasditen e së mërkurës, në një lokal në shëtitoren bregdetare “Taulantia” në Durrës. Ngjarja ndodhi rreth orës 17:30, ku 52-vjeçari Elton Shllaku u qëllua me pistoletë në dorë. Policia njoftoi se autor i dyshuar ishte një 61-vjeçar, banues në lagjen nr. 1, i cili u largua nga vendi i ngjarjes pasi qëlloi për motive të dobëta ndaj 52-vjeçarit. Shllaku u dërgua në spital ku ndodhet jashtë rrezikut për jetën. Hetimet e mëtejshme e lidhën ngjarjen me një konflikt pronësie për shitblerjen e një banese. Sipas burimeve policore, i plagosuri Shllaku, 61-vjeçari Fatmir Ferhati dhe një person tjetër kanë qenë ulur në një tavolinë për të sqaruar mosmarrëveshjen, por situata përfundoi me përdorimin e armës. Në orët e vona të mbrëmjes, Ferhati u shoqërua nga policia në komisariat, ndërsa personi tjetër është shpallur në kërkim. Grupi hetimor do të bëjë dhe kqyrjen e kamerave të sigurisë për të përcaktuar dinamikën e ngjarjen dhe personin që qëlloi. Burimet sqarojnë se konflikti nuk lidhet me ushtrimin e profesionit të avokatit, ndërsa Shllaku, që ka punuar më parë në hipotekë, njihet edhe si ndërmjetës në çështje pronësie. Sipas policisë, në dëshminë e tij i plagosuri nuk ka dhënë detaje mbi mosmarrëveshjen. Hetimet vijojnë nën drejtimin e Prokurorisë për zbardhjen e plotë të ngjarjes.