Një sasi prej 80 kilogramësh kanabis e llojit "Gelato", e trafikuar nga Kanadaja drejt Shqipërisë, është sekuestruar në Portin e Durrësit. Lënda narkotike, në zbulimin e së cilës ndihmoi dhe qeni antidrogë, ishte ndarë në 127 pako, ndërsa vlera e saj në treg përllogaritet në rreth 1 milion euro. Kanabisi “Gelato” njihet për përqendrimin e lartë të THC-së, substanca psikoaktive që shkakton efektin dehës të kanabisit. Sipas policisë, droga dyshohet se ishte siguruar në Ontario të Kanadasë dhe ishte fshehur në një hapësirë të posaçme të modifikuar në një automjet të porositur për blerje në Kanada. Nga hetimet dyshohet se, pas mbërritjes në Shqipëri, lënda narkotike do të shpërndahej në territorin shqiptar dhe më tej në Kosovë. Sipas Policisë, gjatë operacionit u vunë në pranga tre shtetas shqiptarë nga Kosova:Taulant Duraku, 32 vjeç, Luan Gashi, 26 vjeç dhe Besfort Jaka, 40 vjeç.