Një javë pas krimit, policia ka zbardhur fundin tragjik të një 33-vjeçari në Spitallë të Durrësit. Pas një pune intensive hetimore, u arrit të identifikohet dhe arrestohet autori i dyshuar, Majlind Habibi, 35 vjeç, i cili dyshohet se e ka shtyrë qëllimisht viktimën, Branko Shkoza, duke e hedhur nga ura në një kanal ujërash të ndotura. Rrëzimi i ka shkaktuar atij vdekjen. Ngjarja ka ndodhur më 2 dhjetor. Dy ditë pas ngjarjes, babai i viktimës kishte kërkuar ndihmën e policisë për gjetjen e të birit që nuk ishte kthyer në shtëpi. Pas kërkimeve, të enjten e kaluar, më 5 dhjetor, trupi i pajetë i viktimës u gjet në kanalin afër banesës së tij, në lagjen nr. 15, ku banonin të dy, autori dhe viktima. Në fillim, ekspertiza paraprake nuk konstatoi shenja dhune, duke ngritur dyshime se vdekja e të riut ishte një aksident. Analizat e mëtejshme dhe provat shkencore zbuluan se ngjarja nuk ishte aksidentale. Hetimet zbuluan se pas një konflikti për motive të dobëta, Majlind Habibi kishte shtyrë viktimën nga ura, duke e hedhur në kanalin, ku më pas u gjet i pajetë. Operacioni policor, i koduar "Kontakti", çoi në arrestimin e autorit të dyshuar, ndërsa hetimet po vijojnë për të sqaruar rrethanat e plota të kësaj ngjarjeje të rëndë dhe për të dokumentuar akuzat ndaj autorit të dyshuar.