Pasi përfundoi punën si shef i SPAK-ut në Shqipëri, Altin Dumani duket se po diskuton për angazhimin e tij të radhës. Ai të enjten ka pritur në takim përfaqësuesit e Ambasadës së Britanisë së Madhe në Prishtinë, nga ku u dhanë sinjale se Dumani mund të angazhohet, në një të ardhme të afërt edhe në Kosovë. "Të kënaqur që ekipi ynë u takua sot me Altin Dumanin, Shefin e SPAK-ut për të diskutuar lehtësimin, në të ardhmen e afërt, të shkëmbimit të njohurive, ekspertizës dhe përvojës profesionale me institucionet e zbatimit të ligjit të Kosovës. Ky angazhim, i mbështetur përmes projektit tonë, thekson rëndësinë e bashkëpunimit rajonal dhe bashkëpunimit praktik në forcimin e sundimit të ligjit" thuhet në njoftim. Sipas këtij komunikimi zyrtar, roli i Dumanit mund të jetë vetëm këshilldhënës për institucionet e drejtësisë në Kosovë. Altin Dumani më 18 dhjetor mbylli mandatin se shef i SPAK-ut dhe do vazhdojë si prokuror i këtij institucioni dhe drejtues i strukturës kundër krimit të organizuar. SPAK-u tashmë drejtohet nga Klodian Braho.