Këngëtarja me famë botërore Dua Lipa ka paditur kompaninë Samsung, duke kërkuar 15 milionë dollarë dëmshpërblim për përdorim të paautorizuar të imazhit të saj në paketimet e televizorëve të kompanisë. Sipas dokumenteve të depozituara në Gjykatën Qendrore të Kalifornisë, Dua Lipa pretendon se Samsung ka përdorur një fotografi të saj të realizuar në prapaskenat e festivalit “Austin City Limits” në vitin 2024, për të promovuar disa modele televizorësh gjatë vitit 2025, pa miratimin apo kompensimin e saj. Në padi, artistja akuzon kompaninë për shkelje të të drejtave të autorit, të markës tregtare dhe të drejtave mbi imazhin personal, duke e cilësuar përdorimin e fotografisë si “shfrytëzim komercial të paautorizuar” të figurës së saj. Sipas pretendimeve, fotografia e Dua Lipës është vendosur në mënyrë të dukshme në kutitë e televizorëve të ekspozuar në dyqane, duke krijuar përshtypjen se këngëtarja kishte një marrëveshje promocionale me Samsung, gjë që ajo e mohon kategorikisht. Në dosjen gjyqësore thuhet gjithashtu se kompania ka injoruar kërkesat e përsëritura për të ndaluar përdorimin e imazhit. Madje, sipas padisë, disa konsumatorë kanë deklaruar në rrjetet sociale se vendosën të blinin televizorët pasi panë fotografinë e artistes në paketim. “Fytyra e zonjës Lipa u përdor në mënyrë të dukshme në një fushatë masive marketingu, pa dijeninë, pëlqimin apo kontrollin e saj”, thuhet në dokumentin e depozituar në gjykatë.