Shumë pak njihej dhe po aq pak dihej për bazën ushtarake amerikane në Jordaninë verilindore para se një sulm me dron të vriste tre ushtarë të saj dhe plagoste 34 të tjerë. Zëri Amerikës thotë se baza e njohur si “Kulla 22” është e vendosur ne shkretëtirën e Jordanisë, pranë zonës së çmilitarizuar në kufi me Sirinë, pavarësisht se pas sulmit me dron Jordania e mohoi ekzistencën e kësaj baze brenda kufirit të saj. “Kulla 22” është po ashtu vetëm 10 kilometra nga kufiri i Irakut. Baza filloi si një pikë jordaneze e vëzhgimit të kufirit, por në 2015 atje pati një rritje të pranisë amerikane pas vendimit të Shteteve të Bashkuara për të dërguar trupa në Siri për të luftuar Shtetin Islamik. Në këtë bazë të vogël ka 350 ushtarë, duke përfshirë njësi të inxhinierisë, aviacionit, logjistikës dhe forcave ajrore të Shteteve të Bashkuara. Vendndodhja e bazës ka krijuar mundësi për hyrje dhe dalje më të lehtë nga Siria për forcat amerikane. Kjo bazë ndodhet përgjatë një autostrade siriane që të çon në Irak dhe përfundimisht në Mosul, dikur një qendër e Shtetit Islamik. Kjo është gjithashtu një rrugë e mundshme e dërgesave të armëve për Iranin. Trupat amerikane e kanë përdorur prej kohësh Jordaninë, një vend që kufizohet me Irakun, Izraelin, territorin palestinez të Bregut Perëndimor, Arabinë Saudite dhe Sirinë, si një qendër të rëndësishme për operacionet e tyre në Lindjen e Mesme. Rreth 3000 trupa amerikane zakonisht janë të pranishme në të gjithë Jordaninë. Pamjet: AFP