Ministri grek i Mbrojtjes, Nikos Dendias, ka konfirmuar për herë të parë zyrtarisht nga Brukseli, gjatë mbërritjes në Këshillin e Ministrave të Mbrojtjes të BE,se droni detar i gjetur pranë Lefkadës ishte ukrainas, duke e cilësuar praninë e tij në Mesdhe si “një çështje jashtëzakonisht serioze”. “Do të kem mundësinë të informoj kolegët e mi, në prani edhe të ministrit ukrainas të Mbrojtjes, për të dhënat që lidhen me dronin që nxorëm nga deti në Greqi, mjetin detar pa pilot për të cilin tashmë jemi të sigurtë se është ukrainas. E kuptoni se prania e këtij droni detar ndikon në lirinë e lundrimit, por edhe në sigurinë e lundrimit. Kjo është një çështje jashtëzakonisht serioze.” Ndërkohë ministri ukrainas i Mbrojtjes nuk dha një përgjigje të menjëhershme, por u rezervua të hetojë çështjen dhe të rikthehet me sqarime. Droni detar u gjet disa ditë më parë pranë Lefkadës nga peshkatarë dhe më pas u tërhoq në portin e Vasilikit. Sipas ekspertëve grekë të sigurisë, bëhet fjalë për një mjet ushtarak të tipit “Magura V5”, i mbushur me rreth 100 kilogramë eksploziv, me aftësi për të goditur anije në sipërfaqe. Autoritetet greke po hetojnë gjithashtu nëse objektivi i tij mund të ishte një cisternë ruse që lëvizte në Mesdhe.