Kryeministrja e qendrës së djathtë e Letonisë ka dhënë dorëheqjen për shkak të mënyrës se si qeveria e saj i ka trajtuar dronët ukrainas që kanë hyrë në territorin letonez nga Rusia, duke rrëzuar qeverinë e saj të koalicionit disa muaj para zgjedhjeve të caktuara në tetor. Evika Siliņa njoftoi dorëheqjen e saj të enjten, një ditë pasi partia Progresiste, partneri i saj i koalicionit me prirje të majta, tërhoqi mbështetjen për shkak të vendimit të saj për të shkarkuar ministrin e mbrojtjes, Andris Sprūds, anëtare e Progresistëve. Duke njoftuar dorëheqjen e saj, Siliņa tha: “Gjëja më e rëndësishme për mua është mirëqenia e letonezëve dhe siguria e vendit tonë… Lufta brutale e zhvilluar nga Rusia në Ukrainë ka ndryshuar situatën e sigurisë në të gjithë Evropën.” Siliņa tha se kishte humbur besimin te ministri i mbrojtjes për shkak të trajtimit të incidenteve që përfshinin dronë endacakë, të dyshuar se ishin nga Ukraina, të cilët kishin kaluar në Letoni. Në incidentin më të fundit, më 7 maj, dy dronë shpërthyen në një objekt depozitimi nafte. Kjo “tregon qartë se sektori i mbrojtjes nuk ka arritur të përmbushë premtimin e tij për qiell të sigurt mbi vendin tonë”, pati thënë kryeministrja të dielën duke sulmuar vartësin e saj Andris Sprūds. Ukraina u shfajësua duke akuzuar Rusinë se kishte çaktivizuar sistemet qendrore dhe kishte devijuar dronët që ishin drejtuar në Moskë, duke I çuar ata në Letoni dhe vende të tjera.