Ushtria e Kosovës është pajisur me dronë Bayraktar, për të cilët muaj më parë Ministria e Mbrojtjes kishte nënshkruar kontratë me një kompani prodhuese në Turqi, thonë mediat atje. Sipas Telegrafit, dronët kanë mbërritur gjatë dy ditëve të kaluara në Aeroportin Ndërkombëtar të Prishtinës dhe për këtë kishte edhe prani të shtuar të Forcës së Sigurisë në zonën VIP të Aeroportit. Lidhur me ardhjen e dronëve në Kosovë ka shkruar edhe shtypi turk. Presidentja e Kosovës Vjosa Osmani e vizitoi vitin e kaluar fabrikën e dronëve “Bayrakar”. “Vizitën në Turqi e fillova në fabrikën për prodhimin e dronëve “Bayaktar”, në Stamboll, e cila është një rrëfim inspirues për arritjet në sferën e avancimit teknologjik dhe inovacionit të ndërlidhur me sektorin e mbrojtjes dhe të sigurisë”, pati deklaruar ajo. Edhe ministri i Mbrojtjes, Armend Mehaj vitin e kaluar realizoi një vizitë në Turqi, ku u njoh me dronët dhe teknologjinë e fundit që po prodhohen në kompaninë Baykar. Dronët inteligjentë janë pajisje pa pilotë, që kontrollohen nga një bazë tokësore.Dronët Bayraktar, TB2, hyjnë në mesin e armëve që kanë qëndrueshmëri të gjatë në lartësi të mesme (MALE), me rekord fluturimi deri në 27 orë e 3 minuta dhe përveç sulmeve të armatosura kanë për funksione kryesore misionet e inteligjencës, vëzhgimin dhe zbulimin.