Kartelet e meksikane dhe kolumbiane vijojnë të tentojnë mënyra të reja për trafikun ndërkombëtar të drogës. Agjentët kufitarë të Shteteve të Bashkuara të amerikës njoftuan se kanë kapur një kamion që transportonte metamfetaminë, me vlerë më shumë se 5 milionë dollarë. operacioni u krye në kufirin SHBA-Meksikë, ndërsa lënda narkotike ishte e fshehur brenda një ngarkese me shalqinj. Droga ishte e mbështjellë me plastikë të lyer me dy nuanca të gjelbërta, që t'i ngjante frutave dhe ishte vendosur mes shalqinjve të vërtetë. Më shumë se dy tonë metamfetaminë, në një total prej 1220 pakosh u sekuestruan nga agjentët kufitarë. Fshehja e drogës midis produkteve ushqimore është një mënyrë e zakonshme për të kontrabanduar substancat e paligjshme përtej kufijve. Dërgesat e bananeve janë më të njohurat, por oficerët kanë gjetur kohët e fundit lëndë narkotike edhe në djathin Gouda apo nëpër avokado. Kartelet meksikane të drogës janë prodhuesit dhe furnizuesit kryesorë të metamfetaminës në Shtetet e Bashkuara të Amerikës. Në muajin shkurt, forcat meksikane të sigurisë kapën më shumë se 40 tonë drogë në laboratorin më të madh të zbuluar vitet e fundit.