Një sasi e dyshuar kokaine, gurë të ngjashëm me diamantet dhe një pajisje për zbulimin e metaleve të çmuara janë zbuluar gjatë kontrolleve të ushtruara në portin detar te Durrësit gjatē ditës së sotme. Gjetjet, të konstatuara në mjete dhe bagazhe të mbërritura nga Italia, kanë çuar në nisjen e hetimeve nga autoritetet. Sipas Doganës së Durrësit, në bashkëpunim me Policinë e Shtetit, gjatë kontrollit të një automjeti të mbërritur me tragetin Ankona-Durrës u gjet një valixhe me aparaturë për detektimin e metaleve të çmuara dhe aksesorët përkatës. Ndërkohë, gjatë kontrollit të një shtetasi që udhëtonte me një tjetër automjet nga Italia, u zbuluan katër paketime transparente me gurë të ngjashëm me diamantet. Në një automjet tjetër u gjet edhe një sasi lënde narkotike e dyshuar si kokainë, e fshehur në kabinën e drejtuesit të mjetit. Për të gjitha rastet po kryhen hetime të mëtejshme.