I paraqitur kryesisht si një akt mbrojtjeje për popullin amerikan kundër një regjimi që kërkon të destabilizojë Shtetet e Bashkuara, me trafikun e drogës dhe kriminelët e liruar nga burgjet e Maduros, sulmi i Donald Trump ka kryesisht rëndësi gjeopolitike, me ndikim të thellë ekonomik dhe ruajtjen e të drejtës ndërkombëtare. Është kjo analiza e mediave italiane për sulmin ushtarak të forcave amerikane në Venezuelë, që u finalizua me kapjen e presidentit Nicolas Maduro dhe bashkëshorten e tij. Sipas medieve italiane, droga nuk është faktori kryesor i sulmit në Venezuelë. “Corriere” shkruan se Venezuela e Maduros ishte prej kohësh në shënjestër të Trump, dhe Sekretarit të Shtetit, Marco Rubio, veçanërisht sepse Rusia dhe Kina kishin rritur ndjeshëm ndërhyrjet e tyre në mbështetje të regjimit të vendit, që ka rezervat më të mëdha të naftës në botë. Prej kohësh, Venezuela ishte bërë një furnizuese kryesore e naftës bruto për kundërshtarët e SHBA-së: Kinën, Rusinë, Iranin dhe Kubën. Kjo, thekson gazeta italiane, është një situatë është e patolerueshme në sytë e Trump, duke shtuar se, kontrolli i burimeve energjetike të vendit është shkaku i vërtetë i ndërhyrjes amerikane. Sipas “Corriere”, Trump ka folur vazhdimisht për dëshirën e tij për ta rikthyer ekonominë venezueliane në gjirin e sistemit kapitalist të Amerikës së Veriut.