Një defekt i rëndë në njërën prej fletëve të motorit të djathtë të një Boeing 737 të Ryanair shkaktoi një zinxhir ngjarjesh që çuan në thyerjen e një dritareje dhe tërheqjen pjesërisht të një pasagjeri gjatë një fluturimi mbi Greqi më 10 korrik. Avioni, i cili ishte nisur nga Selaniku drejt Memmingenit në Gjermani, kishte 155 persona në bord. Problemet u shfaqën gjatë ngjitjes, kur avioni ndodhej në një lartësi prej rreth 16 mijë metrash, disa kilometra larg kufirit me Maqedoninë e Veriut. Të dhënat paraprake të hetimit tregojnë se shkaku i mundshëm i incidentit ishte dëmtimi i metalit dhe konsumimi i pjesshëm i një prej fletëve të motorit. Sensorët regjistruan fillimisht një rritje të ndjeshme të dridhjeve në motor, ndërsa disa minuta më vonë u dëgjua një zhurmë e fortë, u shkëput autopiloti dhe u aktivizuan paralajmërimet në kabinën e pilotëve. Hetuesit përcaktuan se fleta numër 10 e motorit u këput. Fragmentet e saj u hodhën me shpejtësi të madhe, duke dëmtuar mbulesën e jashtme të motorit dhe duke depërtuar në pjesën e poshtme të trupit të avionit.