Trupi i opozitarit rus Alexei Navalny i është kthyer nënës, sipas zëdhënës të tij. Në një postim në rrjete sociale, Kira Yarmysh falënderoi të gjithë ata që kishin kërkuar që autoritetet të dorëzonin eshtrat e tij. Funerali nuk është bërë ende”, shkroi më tej ajo. Sipas zëdhënëses, nënës së Navalnyt, Ludmila, i është thënë që të nënshkruante një marrëveshje ku pranonte që djalit t’i bëhej një varrim i fshehtë dhe nëse ajo refuzonte, ai do të varrosej në koloninë e burgut ku vdiq. Ajo e ka kaluar javën e fundit në qytetin afër burgut ku opozitari rus vdiq, duke u përpjekur fillimisht të konfirmonte vendndodhjen e trupit të tij dhe më pas duke kërkuar që t'i kthehej. Pasi nënshkroi një certifikatë vdekjeje që thoshte se Navalny kishte vdekur për shkaqe natyrore, asaj iu dhanë tre orë kohë për të rënë dakord për një funeral "të fshehtë" për djalin e saj. Situata mbetet ende e paqartë për funeralin pasi Ludmila duket se ka refuzuar të negociojë me autoritetet. "Ne nuk e dimë nëse autoritetet do të ndërhyjnë që ajo të kryhet në mënyrën që familja dëshiron dhe siç e meriton Alexei," tha zëdhënësja e tij, Kira Yarmysh.