Në një lëvizje të bujshme Aleksandar Vuçiç ka dhënë dorëheqjen e paralajmëruar këtë të diel të 27 shtatorit nga posti i Presidentit të Serbisë. Pas më shumë se nëntë vitesh në krye të shtetit, Vuçiç shfrytëzoi fjalimin e tij të lamtumirës nga Presidenca për të shpallur një "kapitull të ri" politik, vetëm një muaj përpara zgjedhjeve të parakohshme parlamentare të 25 tetorit. Largimi i Vuçiçit nga presidenca shtatë muaj përpara përfundimit zyrtar të mandatit të tij të dytë nuk shënon një tërheqje nga politika, por një rokadë të llogaritur për pushtet. Kushtetuta e Serbisë ia ndalonte atij kandidimin për një mandat të tretë presidencial. Për këtë arsye, ai ka vendosur të udhëheqë listën e Partisë Progresive Serbe si "qytetar i thjeshtë" dhe synon të emërohet Kryeministër i ri i vendit nëse partia e tij arrin të formojë qeverinë. Detyrën e Presidentit të përkohshëm do ta ushtrojë kryetarja e Parlamentit, Ana Brnabiç, ndërsa zgjedhjet e reja presidenciale duhet të mbahen brenda 90 ditëve. "Në fjalimin e tij të fundit, Vuçiç u ndal gjatë te çështjet gjeopolitike, duke lënë disa mesazhe të qarta për pasuesit e tij. Ai porositi me tone të ashpra se Beogradi nuk duhet të heqë dorë kurrë nga mbështetja për serbët në Kosovë, duke refuzuar idenë se braktisja e kësaj kauze do t'i sillte Serbisë një të ardhme më të mirë. Vuçiç kërkoi që vendi të vazhdojë rrugën e integrimit evropian, por pa sakrifikuar lidhjet e ngushta me ato që i quajti "miqtë tradicionalë në Lindje" (duke iu referuar Rusisë dhe Kinës).Ai u mburr për rënien e borxhit publik nga 77% në 43% të PBB-së, si dhe për hapjen e më shumë se 300 fabrikave gjatë dekadës së tij në pushtet. Tashmë, vëmendja zhvendoset e gjitha te kutitë e votimit të 25 tetorit, ku partia e Vuçiçit do të përballet me lëvizjen anti-korrupsion të studentëve "Lista e Studentëve" dhe opozitën pro-perëndimore.