Një zhvillim i rëndësishëm ka përfshire Universitetin e Shkodrës Luigj Gurakuqi. Rektori Tonin Gjuraj ka paraqitur dorëheqjen e tij të parevokueshme, duke argumentuar se autonomia universitare po cenohet dhe se drejtimi i institucionit po përballet me ndërhyrje që, sipas tij, pengojnë procesin e reformimit. Në letrën drejtuar ministres së Arsimit, Gjuraj shprehet se mandati i tij buron nga komuniteti universitar dhe se misioni i tij ka qenë transformimi i universitetit mbi parimet e transparencës, përgjegjësisë publike dhe pavarësisë institucionale. Dorëheqja vjen pas muajsh tensionesh me Bordin e Administrimit, të cilin Gjuraj e akuzon për vendimmarrje të paligjshme dhe për tejkalim të kompetencave. Ai kundërshton veçanërisht emërimin e administratorit të universitetit, shtyrjen e moshës së pensionit për anëtarët e bordit dhe mënyrën e menaxhimit të fondeve të projekteve. “Rektori është i përkohshëm, Bordi i Administrimit i jashtëkohshëm, por Universiteti i Shkodrës ‘Luigj Gurakuqi’ është dhe mbetet i përhershëm”, shkruan ai në një nga pjesët e letrës së dorëheqjes.