Tre ministra të qeverisë në Ukrainë dhanë dorëheqjen, teksa vendi u përball me një nga sulmet më të rënda nga forcat ruse. Mbi 50 persona humbën jetën dhe më shumë se 200 të tjerë mbetën të plagosur nga sulmi rus me raketa balistike në qytetin Poltava. Ministri i Industrive Strategjike, Alexander Kamyshin, Ministri i Drejtësisë Denys Maliuska dhe Ministri i Ekologjisë Ruslan Strilets paraqitën dorëheqjet e tyre në parlamentin ukrainas, bëri të ditur kryetari Ruslan Stefanchuk. Edhe kreu i Fondit të Pronës Shtetërore të Ukrainës, Vitalii Koval, dorëzoi dorëheqjen pas nëntë muajsh në detyrë. Sipas Stefanchuk, parlamenti i Ukrainës do të shqyrtojë dorëheqjet e zyrtarëve “në një nga seancat e ardhshme plenare”, ndërkohë që arsyet e dorëheqjeve nuk janë specifikuar. Lajmi vjen pas disa muajsh raportimesh për zëvendësimin e mundshëm të disa ministrave ukrainas. Opozita kritiko presidentin Volodymir Zelensky për arrogancë dhe shpërfillje jo vetëm ndaj pakicës, por edhe ndaj zërave kritikë që ka në radhët e tij, duke lënë të kuptohet se katër të larguarit prej kohësh kishin mosmarrëveshje me liderin e tyre.