Bisedimet mes SHBA-së dhe Iranit nuk u zhvilluan gjatë fundjavës, pasi presidenti Donald Trump anuloi një udhëtim të planifikuar të zyrtarëve amerikanë drejt Pakistanit. Menjëherë pasi delegacioni i Teheranit ishte larguar nga Islamabadi, Trump njoftoi të shtunën se i dërguari special Steve Witkoff dhe Jared Kushner do të humbnin “shumë kohë” duke udhëtuar drejt kryeqytetit pakistanez. Ministri i Jashtëm iranian Abbas Araghchi zhvilloi bisedime me ndërmjetësit në Pakistan gjatë fundjavës, duke deklaruar më pas se kishte paraqitur qëndrimin e Iranit për përfundimin e luftës, por se mbetet për t’u parë nëse SHBA është “vërtet serioze për diplomacinë”. Pavarësisht zgjatjes së armëpushimit nga Trump, të dyja palët mbeten në përballje për ngushticën e Hormuzit, si dhe për ambiciet bërthamore të Iranit. “Nëse duan të flasin, gjithçka që duhet të bëjnë është të telefonojnë,” shkroi Trump në rrjetet sociale të shtunën, ndërsa anuloi udhëtimin e Kushner dhe Witkoff drejt Islamabadit. Presidenti amerikan sugjeroi se SHBA “i ka të gjitha kartat në dorë”, ndërsa në Iran ka “përçarje të mëdha dhe konfuzion brenda udhëheqjes së tyre”. Ai shtoi: “Askush nuk e di kush është në krye, madje as ata vetë.” Ministri i Jashtëm i Iranit Abbas Araghchi tha se kërkesat e tepruara të SHBA-së kanë çuar në dështimin e negociatave të paqes në Islamabad, në komentet për gazetarët lokalë pas mbërritjes në Rusi. Pas MBERITJES në Shën Petersburg, ai tha se do të konsultohet me aleatët rusë për luftën në Lindjen e Mesme, në një intervistë në persisht të shpërndarë në kanalin e tij në Telegram. Ai mbërriti në Rusi pas bisedimeve me ndërmjetësit në Islamabad dhe tha se diskutimet kishin trajtuar kushtet për vijimin e negociatave. Ministri përmendi gjithashtu mbylljen e vazhdueshme të ngushticës së Hormuzit nga Irani, duke theksuar se kalimi i sigurt në këtë rrugë kyçe ujore mbetet një çështje globale dhe duke bërë thirrje për bashkëpunim me fqinjët, përfshirë Omanin.