Udhëheqësi i rebelëve sirianë, Mohammad al-Jolani deklaroi se ai do të shpërbënte forcat e sigurisë të regjimit të rrëzuar të Bashar al-Asad. Jolani, emri i vërtetë i të cilit është Ahmad Al Sharaa, në një intervistë për Reuters tha se do të “shpërndante forcat e sigurisë të regjimit të mëparshëm dhe do të mbyllte burgjet famëkeqe”. Ndërkohë, udhëheqësi i qeverisë siriane i lidhur me rebelët, Mohammad Al-Bashir, i cili është emëruar si kryeministër i vendit, tha për mediat italiane se qeveria e përkohshme do të qëndrojë vetëm deri në mars. Në një intervistë për gazetën Corriere della Sera, Bashir tha se “ne do të qëndrojmë vetëm deri në mars 2025”. Ai shtoi se prioritetet ishin rivendosja e sigurisë dhe autoritetit shtetëror, sjellja në shtëpi e miliona refugjatëve sirianë dhe ofrimi i shërbimeve thelbësore. Kur u pyet nëse kushtetuta e re e Sirisë do të ishte islamike, ai tha se “këto detaje” do të sqaroheshin në procesin e krijimit të kushtetutës. Kujtojmë se ish-presidenti Bashar al-Assad u largua nga Siria drejt Rusisë, ku ka marrë azil politik së bashku me familjen e tij.