Një variant i ri i Covid-19, i pagëzuar me emrin si Stratus po përhapet me shpejtësi në Europë, dhe po monitorohet me kujdes nga Organizata Botërore e Shëndetësisë për shkak te aftësise se madhe qe ka për të shmangur antitrupat. Stratus, i kthyer në variantin dominues në Indi gjatë pranverës, ka si tipar kryesor ngjirjen e zërit. Ndryshe nga variantet e mëparshme, ku humbja e shijes dhe nuhatjes ishte më e shpeshtë, tani pacientët raportojnë kollë të thatë, dhimbje fyti dhe probleme me zërin. Shumë nga të prekurit në Britaninë e Madhe ankohen edhe për vështirësi gjatë gëlltitjes. Simptomat e tjera përfshijnë ethet, dhimbjet muskulore dhe bllokimin errugëve të frymëmarrjes. Prania e Stratusit është rritur ndjeshëm në kontinentin e vjetër nga 10.6% në 16.7%, ndërkohë që në Azinë Juglindore ky variant mbizotëronte në masën gati 69%. OBSH-ja vlerëson megjithatë se rreziku në nivel global është realtivisht i ulët. Ekspertët e saj thonë se "vaksinat e miratuara aktualisht kundër Covid pritet të jenë efikase edhe kundër këtij varianti" e të mbrojnë nga "sëmundja simptomatike dhe e rëndë". Në disa vende aziatike sidoqoftë ka pasur shtim të beftë të rasteve të reja dhe shtrime në spital. Por sipas të dhënave të disponueshme deri më sot, nuk duket se ky variant çon në gjendje më të rënduar së zakonisht apo në vdekje.