Kryeministri Edi Rama ka pritur në një takim zëvendës kryeministrin, njëherësh ministër i Jashtëm i Italisë, Antonio Tajani, i cili ndodhet në një vizitë zyrtare në Shqipëri. Kryeministri Rama tha se me zotin Tajani pritet të firmosë një marrëveshje të rëndësishme dhe e shumëpritur siç është ajo e pensioneve të shqiptarëve në Itali. Kjo marrëveshje njeh vitet e punës të punës të 500 mijë shqiptarëve që jetojnë e punojnë prej vitesh në Itali. Megjithatë në fokus të diskutimeve me kryediplomatin italian ishte edhe marrëveshja për emigrantët e firmosur rreth një muaj më parë mes dy vendeve. Për këtë arsye, gjatë paradites së të premtes numri dy i qeverisë italiane ka zhvilluar edhe një vizitë në zonën e Gjadrit aty ku është planifikuar që të ndërtohet kampi ku do të strehohen refugjatët. Por marrëveshjen e nënshkruar nga kryeministri Rama dhe homologia e tij, Giorgia Meloni për ngritjen e qendrave për strehimin e emigrantëve të paligjshëm që kapen në detin Mesdhe në Gjadër, po e mban pezull Gjykata Kushtetuese. Më 13 dhjetor, Kushtetuesja mori në shqyrtim kërkesën e bërë nga 30 deputetë të grupit Bardhi-Berisha kundër kësaj marrëveshje duke sjellë automatikisht pezullimin e saj deri në një vendim përfundimtar. Kryediplomati italian u takua po ashtu gjatë së premtes edhe me ministrin e punëve të jashtme, Igli Hasanin.