Mediat belge zbulojnë detaje nga gjyqi për një organizatë kriminale prej 40 personash, shumë prej të cilëve shqiptarë, të akuzuar për trafik ndërkombëtar kokaine. Duke zbardhur dosjen hetimore, “La Libre” raporton se operacioni daton në 30 shtator 2020 kur, kur u gjet një furgon me lëndë kimike që përdoren për përgatitjen e kokainës, vaj kanabisi dhe rrëshirë e uniforma false policie. Pas përgjimeve, autoritetet ranë në gjurmët e autorëve, përfshirë një të dënuar në Barcelonë pasi ishte kapur me 441 kg kokainë, që me duket vazhdon të drejtojë trafikun e drogës nga qelia. Një tjetër udhëtonte shpesh në Dubai, Greqi apo Meksikë dhe zotëron një plantacion legal kanabisi në Greqi, të subvencionuar nga qeveria. Trafikantët takoheshin në parkingjet e supermarketeve, ku këmbenin çantat. Ndërsa në Zutendaal u gjet një magazinë ku dorëzoheshin fuçitë me drogë. Falë dekodimit të kriptofonave “Sky ECC”, në telefonin e Indrit K., një prej të pandehurve kryesorë, shihen foto të bareve të kokainës, armëve, ekstazive, kartëmonedhave si dhe indikacionet e pagesave që duheshin bërë në Amerikën Latine dhe dëshmi të transfertave nga Brazili dhe Bolivia në Francë, Belgjikë dhe Angli. Kokaina transportohej nga Amerika e Jugut në Belgjikë me anije peshkimi të cilat e lënë kokainën në det ku ajo merret me jahte, me fluturime komerciale, me avionë privatë apo edhe në kontejnerë. Organizata kriminale ishte aktive edhe në trafikun e armëve, makinave dhe drogës, si dhe prostitucionit. Bëhet fjalë për transferime futbollistësh për shuma të konsiderueshme. Menaxherët i investojnë të ardhurat e tyre në pasuri të paluajtshme në Gjermani, Shqipëri, Itali dhe Spanjë, kryesisht në Mallorca. Koka e grupit ishte një shqiptar nga Kosova, Bashkim O., që së bashku me Artur S., u vendosën në Majami, ishte shënjestruar në Spanjë nga hetimet që nga viti 2018. Ky i fundit, së bashku me një tjetër shqiptar, dyshohet se kanë diskutuar investimin në një kullë në Tiranë, por ata vetë e mohojnë një gjë të tillë.