Një rast i paprecedentë ndodhi dy ditë më parë në spitalin e Durrës, ku tre persona rrahën një 32-vjeçar, i cili po ruhej nga policia. Rreth orës 21.00 në urgjencën e Spitalit rajonal Durrës tre persona kundërshtuan me forcë policinë dhe rrahën në mënyrë barbare të riun. Sipas informacioneve, autorët ishin babai, xhaxhai dhe një familjar tjetër i partneres së të riut. Te tre u arrestuan një ditë pas ngjarjes, rreth orës 2:30 të mëngjesit. Top Channel ka siguruar foto të të 32-vjeçarit, i cili ka nga dhuna ka marrë plagë në kokë, qafë, fytyrë dhe krah. Vetë ai ka deklaruar në polici se prej një viti ka një romancë me vajzën e familjes që e dhunuan, por kur ka kërkuar ta bëjë familjare lidhjen, është kundërshtuar nga familja. Sipas dëshmisë, ai ka marrë mesazhe kërcënuese nga babai i vajzës se do t’i vriste të dy. “Babai më ka thënë të shkoj të marr vajzën dhe të zhdukem bashkë me të dhe mos të dukem më në Shqipëri pasi në të kundërt do na vriste të dyve”, ka rrëfyer ai. Mbi tre të dyshuarit rëndojnë veprat penale të “kundërshtimi i punonjësve të policisë së rendit”, “plagosje e lehtë me dashje” dhe “prishje e rendit dhe qetësisë publike”.