Para largimit nga Shqipëria, Zëvendës Ndihmës Sekretari Amerikan i Shtetit për Ballkanin Perëndimor, Alexander Kasanof, ripërsëriti mesazhet e qarta dhe të forta për çrrënjosjen e korrupsionit. Në një intervistë për “Zërin e Amerikës”, Kasanof theksoi se SHBA do vijojë të mbështesë SPAK-un edhe me fakte. “Asnjë burrë a grua nuk është mbi ligjin dhe se çështjet që ndjek SPAK do të arrijnë kudo ku çojnë provat dhe kjo është diçka që e mbështesim jo vetëm si proces, por edhe si një radhë faktesh në terren që ndihmojnë për të luftuar korrupsionin dhe çrrënjosur krimin e organizuar”. Kasanof u pyet dhe marrëdhëniet që Sali Berisha, i shpallur “non grata”, do të ketë me Uashingtonin, nën administratën e re të Donald Trump. “Normalisht nuk flas për personat e përcaktuar dhe hollësitë e atyre rasteve. Ajo që do të doja të ritheksoja këtu është se Shtetet e Bashkuara i shohin përcaktimet si mjet i rëndësishëm për të ndihmuar reformat e sistemit të drejtësisë dhe ndjekjen e çështjeve anti-korrupsion dhe të krimit të organizuar. Nuk mund të flas në emër të administratës që vjen. Do të ishte e pavend. Por, mund të ritheksoj për ju që në administratën e tanishme, ne do të vazhdojmë të fokusohemi tek këto reforma dhe të fokusohemi tek ndihma që institucione si SPAK-u të përmbushin misionin e tyre. Në fund, zëvendës ndihmës sekretari amerikan i shtetit komentoi dhe zgjedhjet e pranverës në Shqipëri, duke iu bërë thirrje partive politike që të zgjedhin kandidatë të panjollosur nga korrupsioni apo krimi i organizuar.