Në vitin 2019 Altin Dumani shtrëngoi dorën me presidentin e asaj kohe Ilir Metën ku u betua si prokuror i SPAK, ndërsa 5 vite më vonë, ishte ai që firmosi flet arrestin për Metën. Vetë Dumani, mori bekimin nga Presidenti Meta më 19 dhjetor 2019, dhe u betua se do të ishte besnik ndaj Kushtetutës dhe ligjeve. “Betohem solemnisht se gjatë kryerjes së detyrës do t’i qëndroj kurdoherë besnik Kushtetutës së Republikës të Shqipërisë, ligjeve në fuqi dhe do të respektoj rregullat e etikës profesionale.” Ditëve të fundit ka bërë bujë lajmi i arrestimit të ish-presidentit Ilir meta për tre akuza, korrupsion, fshehje pasurie dhe pastrim parash. Që kur u thirr në dyert e SPAK ku u pyet para prokurorëve për akuzat ndaj tij, Meta vijoi për muaj me radhë me akuza të rënda ndaj kryeprokurorit Dumani, ndërsa kjo përplasje vijoi edhe në seancën e Metës dy ditë më parë. Ilir Metës iu caktua masa “Arrest në burg”, i dyshuar për kryerjen e veprave penale; “Korrupsioni pasiv i funksionarëve të lartë shtetërorë ose të zgjedhurve vendorë” në 3 raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.