Kaq shumë trajnerë, futbollistë dhe njerëz të sportit në urgjencën e spitalit të Traumës, për të mësuar se si njëri nga djemtë e ngjarjes makabre, pranë shkollës "Fan Noli", po përpiqet të mbijetojë, Luis Meçja i kishte të dielën si tifozë. Ishin atje sepse shënoi dy gola në ndeshjen që Dinamo U15 luajti në Kavajë. 24 orë pas atij gëzimi Luisi pa vdekjen në sy, por që për fat i është larguar. Babai i shokuar, Fiqiri Meçja thotë se djali është qëlluar 4 herë dhe ndonëse tashmë është jashtë rrezikut për jetën, tronditja është e jashtëzakonshme. Por nuk ndodhi kështu me shokun e tij, Martin Cani, mbrojtësin e majtë të Dinamos U15, i cili si për të kërkuar ndihmë pas thikës në zemër, tentoi të rikthehet në oborrin e shkollës, por mbeti tek dera. Përgjithmonë! Trajneri i tyre, Engert Bakalli thotë se i vranë liderin e skuadrës dhe shpirtin e ekipit të tij. Për ngjarjen e rëndë reaguan presidenti i Republikës, Bajram Begaj, Ministria e Arsimit që kërkoi zbardhjen e saj, por edhe klubi Dinamo që humbi një prej lojtarëve të akademisë.