Daniel Sancho Bronchalo, pinjoll i një familjeje të njohur aktorësh në Spanjë, është dënuar me burgim të përjetshëm pasi pranoi vrasjen e 44 vjeçarit Edwin Arrieta Arteaga, një kirurg plastik nga Kolumbia, kur ata ishin të dy me pushime në një resort tailandez në gusht 2023. Gjykata shpalli fajtor Daniel Sancho Bronchalo, i njohur për videot e gatimit në rrjetin YouTube, fajtor për vrasje me paramendim, në çështjen që ka tronditur Spanjën, teksa babai i të akuzuarit, Rodolfo Sancho, është një aktor i njohur dhe shumë gazetarë spanjollë kanë shkuar për gjyqin në Tailandë. Sancho pretendon se konflikti nisi pasi Arrieta tentoi ta sulmonte seksualisht. Ai tha se më pas Arrieta u rrëzua dhe goditi kokën në vaskë, duke humbur ndjenjat e më pas jetën. Por, Sancho ka pranuar copëtimin e trupit të viktimës dhe shpërndarjen e pjesëve në ishull dhe në det. Gjykata fillimisht dha dënim me vdekje për të, por më pas e ktheu në burgim të përjetshëm prej “bashkëpunimit të tij gjatë gjyqit”, sikurse njoftoi policia vendase. Avokati i familjes së viktimës, tha se ata ishin të kënaqur me dënimin. Tailanda mban dënimin me vdekje për krime të rënda si vrasje me paramendim, por rrallëherë kryen ekzekutime, teksa i fundit ka ndodhur në 2018, shkruan rrjeti The Mirror. Source: AFP