Në Ditën Ndërkombëtare të Egjiptianëve të Ballkanit Drejtoria e Përgjithshme e Arkivave çeli një ekspozitë me dokumente mbi historikun, traditat dhe përpjekjet për integrimin e këtij komuniteti në shoqërinë shqiptare, që gjurmën në territorin tonë i ka që prej antikitetit. Për herë të parë, u ekspozua dhe një dorëshkrim i rrallë i vitit 1921 Deklarata “Mbrojtja e Minoriteteve” e nënshkruar nga Fan Noli në emër të shtetit shqiptar në Gjenevë. Sipas INSTAT, zyrtarisht llogariten rreth 12 mijë qytetarë të komunitetit egjiptian në Shqipëri. Që nga viti 2017, egjiptianët në vendin tonë njihen ligjërisht si pakicë kombëtare, por ende përballen me sfida të vazhdueshme Mirela Rrumbullaku, Komisioneri për Mbrojtje nga Diskriminimi - Paragjykimet, steriotipet, diskriminimi që shfaqet në forma të ndryshme, në strehim, në shëndetësi, në shërbime, vazhdojnë të ekzistojnë. Në aktivitet, përfaqësues të këtij komuniteti dhe pjesëmarrës nga disa institucione treguan problemet me të cilat përballen. Arjan Lile, Komiteti për Pakicat Kombëtare - Investimi në arsim mbetet çelësi kryesor për emancipimin e komunitetit. Përfshirja e tyre në jetën publike dhe institucionale është garancia për një shoqëri më të drejtë dhe më demokratike. Ndërsa ruajtrja e historisë dhe trashëgimisë është detyrë e çdo brezi. Ervis Çota, Lëvizja Egjiptiane dhe Rome - Sot kemi më shumë të rinj që përfundojnë arsimin e mesëm, profesional apo universitetin më shumë se sa një dekadë ma parë, por pyetja që mund të shtrojmë është a përkthehet ky progress në mundësi reale. Shumë prej tyre, edhe pasi kanë përfunduar studimet, hasin vështirësi për të ushtruar profesionin.