Luftimet mes Izraelit dhe grupit terrorist të Hamas vijuan edhe këtë të shtunë. Për të pestën javë me radhë, trupat ushtarake izraelite po bombardojnë nga toka, ajri dhe deti; tunelet ku strehohen militantët e grupit terrorist të Hamas. Beteja, tashmë është bërë më e ashpër, pasi ushtarët e Izraelit kanë hyrë në Gaza dhe kanë rrethuar spitalin Shifa. Ushtria izraelite e përshkroi spitalin si qendrën kryesore të komandimit të grupit radikal palestinez Hamas, duke thënë se militantët e grupit po i përdorin civilët si mburoja njerëzore dhe se nën të ka krijuar bunkerë. Beteja pranë kësaj zone është ashpërsuar akoma dhe më shumë, ndërsa furnizimet për civilët janë mbaruar. Po ashtu për shkak të mungesë së karburantit në këtë spital humbën jetën pesë pacientë, përfshirë dhe një fëmijë, pasi aparaturat dolën jashtë përdorimit. Ndërkohë palestinezët akuzuan trupat izraelitë se krahas terroristëve po qëllojnë edhe ndaj civilëve që ndodhen brenda apo jashtë spitalit. Akuza që u hodhën poshtë nga forcat e armatosura izraelite, të cilat I thanë BBC se trupat po luftojnë vetëm me Hamas dhe se do të ndihmojë në evakuimin e foshnjave nga departamenti i pediatrisë së spitalit Al Shifa. Izraeli ka bërë me dije se nuk do të tërhiqet deri sa të lirohen të gjithë pengjet që janë kapur nga Hamasi. Pamjet: AFP